´s Grusswort vom Abteiler
Also erschtmol mecht i älle Fans und Genner begrüssa, dia des Heftle in ihram Briafkasta gfunda hänt oder dia zu ons in dia Halla kommet und onsre Heimspiel agucka wellat! Ond wias in so am Grusswort halt mol üblich isch wird i eich jetzt kurz eisre Mannschafta vorstella:
Auser erschte Männermannschaft spielt wia letscht johr au in dr Bezirksklasse, in dem Jahr missat se uff dr Kähne verzichta, weil der nämlich seine Handballschlappe an dr Nagel g´hengt hot. Abr aus dr A-Jugend kommet jo guate Leut noch, dia letschtes Johr au scho ausgholfa hänt.
Ond auser Zweite dia mr letsch Johr jo Mangels Spieler wiedr zruckzoga hänt wills des Johr wissa au do went Spieler aus dr A-Jugend eigsetzt, weil dia nur ganze acht Spiel bestreita missat, ond ma hot sogar au Leit wiedr dazua brocht ihre Handballschlappe ausm Kasta zum hola, dia do scho eigstaubt waret. Mir wünschet dere Mannschaft natürlich älles Guate zom Eistieg in dia Kreisliga.
Ausre Fraue wänt wieder durch dia Bezirksliga wirbla ond au wiedr a Wörtle mitschwätze, wenns om da Meister goht, leidr hot au do auser Torwart, dia Ute ihre Handballschlappe entgültig in da Gulli kickt. Abr au do hämmer scho jemand gfunda, der se ersetza will. Ond wenn´s Rennerle nächst mol uff dr Fasnet a bisle langsamer duat, dann spielt se dia näscht Rund eventuell au mol a ganze Saisong.
Auser A-Jugend männlich und dia B-Jugend weiblich dia spielat als SG Geilsinga/Auschdorf Manche wänt sich jetz froga, wieso denn nur dia.....? Ganz oafach: Dr HVW (Handballverband Württemberg) lässt halt nur no maximal zwoa Mannschaften in dr Bezirksspielgemeinschaft zua, oder ma miasst a richtig offizielle Spielgemeinschaft macha so richtig mit Vorstand, Kassierer ond Schriftführer ond so.... ond des wut schwierig, find amol so viel Ehraamtliche die des machat!!
Ond dr Rescht vo ausrer Jugend Spielt unterm TSV Geislinga weil do oafach dia Trainingsmeglichkeita do send, ond in dera Halle in Geislinga kommt ma als Auswärti-ger halt mol it nei. Abr i hau Hoffnung neit uffge, dass dia Situatio en Balinga bald besser wut, wenn erscht mol dia nei Halle fetrig isch, vielleicht kriga mir kleine Verei dann au dia ei odr andre Trainingszeit dazua.
Aber ausr E-Jugend ond dia Minis dia kämpfet unterm VfL Auschdorf um des Bälle ond dia hänt au mächtig veil Spaß dro. So des wars fürs erschte mit dem Grusswort, händers älle glesa? Und au verstanda? Am Schluss mecht i eich no bitte, wenner Geld ausgeba wellat, gugat au in dia Gschäfter nei ond kaufat do ei, dia wo bei ons inseriert hont.

Eier Abteiler
Buschi (Michaela Buschmann)
Mir send dia wo gwenna wellat, gell